Geet Unwaan : Insaan kaa dushman

Insaan kaa dushman hai insaa`n

Yeh sun kar hairat hoti hai !

Kyaa tujh ko khabar hai aye bandey

Tu ne jo phool chadaaye hain

Wo maalaa kis ne goondhi hai

Kis ne wo baugh lagaaye hain

Sun ley Tu Rab ke aagey bas

Niyyat ki qeemat hoti hai

Insaan kaa dushman hai insaa`n

Yeh sun kar hairat hoti hai !

Dil ik Hindu ka Muslim ko

Kidney Christian ki ik Sikh ko

Aisaa kyoo`n hotaa hai socho ?

Aisaa kyoo`n hotaa hai bolo ?

Lag jaati hai`n ik doojey ko

Jab jab bhi zaroorat hoti hai

Insaan kaa dushman hai insaa`n

Yeh sun kar hairat hoti hai !

Khudd apney janam se pehle hi

kyaa Too ney mazhab sochaa thaa

Yaa janm ke waqt jo Dr. thi

Kyaa Uss kaa mazhab poochaa thaa

Jab tujh ko bachaaney ki khaatir

Jo khoon charhaa wo kis kaa thaa ?

Bas naam se har ik mazhab hai

Mazhab ki koi pehchaan nahi

Be naam agar zindaa rehtey

Kyaa kehlaatey insaan nahi ?

Insaan kaa dushman hai insaa`n

Yeh sun kar hairat hoti hai !

Qanoon hai yeh iss Dharti kaa

Kis tarah issey jhuttlaao gey

Insaan ko jeeney ki khaatir

Insaa`n ki zaroorat hoti hai.

Insaan kaa dushman hai insaa`n

Yeh sun kar hairat hoti hai !

Hussain Kavish (Mumbai)

Mobile : 09833535045